2025年乙巳家居風水

機緣學社

九運第二年

三元九運裡的一運及九運係影響力最大的，所管轄的地方愈大，受地運的影響力就愈大，上元一運我未有見過，下元九運我應該都見唔完。九運的二十年裡，對中華大地的影響一定很大，我只不過係區區一個風水從業員，中華大地幾時輪到我去評論，都係講番自己所處的一針之地好啲，反正呢個九運我都睇唔完，所以點講都無問題。

人出世時乜都無帶來的，所以第一件事就係要搵錢，要搵錢之前一定要有健康，就必先要知道凶病位在那裡，乙巳年的最凶位原來係東北方，如果這個位置不是自己的主要活動範圍，可以不理。

如果這個凶位座落大門，廚房，睡房，書房就不可掉以輕心，必要認真處理，要化凶星不離用金屬，或金屬所發出的聲音，我推薦用銅制的風鈴，一般大師都認為這個東西無用（因為賣唔起價錢），這個凶星由盤古初開已經存在，所以用最古老的物品化解即可，要化解這個古老凶星的方法亦好簡單，就係將這個唔起眼的風鈴掛在凶星所到之處，自然一年平安（掛在觸手可及的高度，每日第一次經過都碰下佢）。

第二個凶星就座落廳堂中間，不用化解，只要唔擺放任何物件即可，如果一定要擺放（例如餐桌，麻雀枱等等），用完即要收起，否則必生禍端（婦科病）。

第三個凶星係西北方，呢個係歲破位，兼夾係是非星，如果係座落大門口，只要舖設大紅色地毯即可，如果唔係大門口，不用理會。

第四個凶星係正北方，佢個名叫做賊星，無得化解既，只有自己小心門戶（那裡有擺舊野，啲賊仔就唔會入屋？咪咁天真啦）。

睇咗上面嗰 600字，就好肯定乙巳年本地係無運行，因為所有凶星都係來自同一方向（正北，東北，西北）。

要睇一間屋的興衰，首先要注意來往的水路，跟往睇埋山喺邊，水喺邊，就知道呢間屋既分數有幾多。

身處既一針之地，由八運的後十年轉上九運就一直都無運行，最主要就係無一個公認的地標，現在只能以九運加年運的凶星所到來判斷本地運氣。

首先係西北方（乾宮位），係全香港最高的山，只要保持樹木茂盛，無山火發生（都幾難），香港的根基仍然豐厚，每發生一次山火，香港必引發經濟事故，要知道受影響的是什麼人，或什麼事，只要根據八純卦去判斷即可（多年來經驗都有七八成啱）。記得有一年由政治家當權，乜都無發生，悶到抽肋，好希望燒下都好呀，有啲提示（係唔係好衰呢）。

第二係正西位（兌宮位），呢個係似非而是的文昌位，文昌故名思義就係讀書，或者係做文書工作，先決條件係要安靜的環境才可見成績，但呢個位置係本地最大的動態位，可想而知無論讀書或對外交涉都唔會有好成續，尤其是同鬼子佬交手（西方人士），必定蝕底。

第三係西南位（坤宮位），全年最好的女性財位（不愧為九運旺女性），如果在今年打好基礎，真係可以旺到九運尾都唔奇（未結婚不算在內）。

第四個係正南位（離宮位），呢個位置先要有山，成個大環境就肯定唔合格（但風水係有個基本格式，就係高一寸為山，低一寸為水），就係睇下自己所處嘅單位（好多人一生就為呢個四方格仔而努力），南面有無高過自己個單位嘅屋，再睇下北面有無低過自己嘅屋，符合呢個條件的話，男性一定搵到錢（好低層次）。

第五個東南位（巽宮位），呢個係本地既出水位，財富積聚與否就係睇出水口與入水口比較（來去水），本地經濟之所以日益蓬勃，就係得益於來水大去水細，不知誰人下令填海，將來水口收窄，但無將出水口相應收窄，就形成來水小，去水大，本地經濟自然日漸向下。

第六個係正東位（震宮位），呢個係全年最好位置，但亦最易發生事故地方（如果話呢個地方好容易有火災，只不過阿媽係女人啫，無意嘅），將範圍盡量收細，估計係九龍灣及牛頭角一帶，要再細啲實在無能力，我認為引發意外的一定係女人。

第七個係東北位（艮宮位），在乙巳年裡面這個係數一數二的衰位，判斷香港這一年一定比上一年差的理論根據，就係凶星座落於最巖巉既山，這一年除了有不可測的不如意事之外，仲有好多好多口舌之爭，包括指背，小人當道，無可奈何。

第八個係正北位（坎宮位），眾所周知呢個係賊星位，在九運裡面，亦都係先天性衰位，在大地上面只要北方有大水就可化解一切凶象，但本地正北方並無合格的水位，所以無得救。

最後一個就係中宮位，今年就真係應咗一句物先腐而後蟲生，一切禍事都係由自己人攪出嚟嘅，又係無得化解，人心真係好難測。

睇晒今年本地的運星盤加年星盤，兩個凶星都係處於極端位置，五黃太高，二黑太低，無得平衡，運氣實在差，最主要就係無向心力，搵錢能力一般，仲有隨時惹禍上身的可能，最好就係三緘其口，最緊要就係唔好得罪女人。