醒世歌　　　　　　　作者：不詳

金形色白聲清嚮，木形粗髮指如鎗，

水形色黑頭頂平，火形頭尖色帶紅， 土形肉實面圓黃。

五行齊備必定為人上，但世間無幾得咁榮昌。

或者生得有好心田而無好相，所以相從心轉可改禍呈祥。

五官端正乃係聰明相， 富翁圓滿頂平方，

有等話光頭為叫富相，咁就個的和尚座座都係銀房；

牙齊衣食能豐享，滕蛇入口必要餓到硬嘟嘟；

壽長耳大兼神壯，至怕腳跟唔到地必定少年亡；

準頭青現身沾恙，印堂黑影就要買定棺箱；

眉粗折斷兄弟喪，烏雲滿面就要損爹娘；

奸門有痣官非旺，墨侵月角小人傷；

眼下浮青兒女喪，奸門低陷至少都要兩個填房；

準頭光潤財星降，倘若一時微彩色帶浮光，總是散財不用講；

指甲光明正得兒女易養，掌中明潤定必貴人長，骨硬艱辛，榮耀軟掌；

高生驛馬，遠走他方，自古道額角岩嶄爹早喪，山根低陷母先亡；

面皮寬厚朋情廣，紅根滿眼，品性堅剛；

 鼻內空囊斜目看，此人奸滑必要提防；

水星角卸乃係孤寒相；

 目長眉短，難望弟兄幫，眉低壓目神無壯，必定帶埋藤條去跪妻房；

紅筋泛面盡把煙花蕩，好搽脂粉必定眼光光；唇紅眼細必主邪緣廣；

步步垂頭個的定係扭計大王；未言先笑兼斜看，個種就係淫人妻女冇天裝；

行成擺柳好似隨風抰，名為擺尾都冇一半係男郎；

行完兩耳正到天倉，天庭塚墓邱陵上，

轉角邊城共印堂，此係少年步位如斯樣；

重有中年眉目兩顴當，山根年上隨行往，壽上準頭講到在行；

地庫水星係年老倚向，行埋地角是晚景韶光；

婦人第一要益子將夫旺，背圓掌厚一世好風光，

口小鼻圓雙孔吼不昂，能生貴子可旺才郎；

莫話矮婆墮臀唔好樣，一味仔多唔怕絕燈香；

聲清色潤目不斜望，必係同諧到，至少都有三代同堂；

臍凹一分兒一養，二分能見子成雙，

三分三個不是虛講，臍深半寸必有五個兒郎；

肥婆腰窄乃係無兒相，刑夫眉大額頭光，

兩顴黑墨屎會有雙夫喪，顴高眼凸就要剋夠三個才郎；

眼露髮粗皮肉帶慷，定然生產有災殃；

髮短髮粗係壽相，髮長到地又怕自縊懸樑；

面滑身粗係淫賤相，倘若不為奴婢亦要當娼；

半掌一紋為叫斷掌，此人必要過房養育，才保得壽元長；

見人掩面偷斜看，私情密約任偷香；

托腮咬指倚憑門邊望，一見男人就動心腸；

喜怒無常將曲唱，行前盻後好梳裝，

眼光先笑言詞講，但有咁多般形像都係淫娘；

腰長口闊偷愁想，就係懶精唔會把家當；

口咬牙筋兼共鼻昂，個種係陰毒咒人王；

面緊咀尖聲爛帶嚮，掩住半邊口都嗌得幾條鄉；

唇薄帶青兼共面昂，個的嗌交時文隔外在行；

露齒係口疏言語亂講，是非常弄舌劍唇鎗；

以上句句是真常要看，特意傳來挑醒世上。

資料來源：摘錄自互連網，謹供參攷。